ეს არის გზავნილი ხელისუფლების მიმართ, რომ დარჩენილ დღეებში არ გამოიყენოს ისეთი ინსტრუმენტები, რომელიც ეჭქვეშ დააყენებს არჩევნების შედეგებს,- ასე აფასებს „ ევროპული საქართველოს“ საარჩევნო შტაბის ხელმძღვანელი, სერგი კაპანაძე, საქართველოში აშშ-ის ელჩის, კელი დეგნანის განცხადებას, რომლის თქმით, „ქართველი ხალხი იმსახურებს ხმა მისცენ დემოკრატიულ და სამართლიან არჩევნებში“.
კაპანაძის თქმით, პირველ რიგში, ეს არის გზავნილი ხელისუფლების მიმართ, რადგან სწორედ მმართველი გუნდი იყენებს არჩევნებში უკანონო მეთოდებს.
„კელი დეგნანის ეს განცხადება ეხება ყველა პოლიტიკურ პარტიას, მაგრამ იგულისხმება სწორედ ხელისუფლება, რადგან სწორედ ხელისუფლება და „ქართული ოცნებაა“ ის პოლიტიკური ძალა, რომელიც იყენებს უკანონო მეთოდებს, იყენებს ძალადობასა და მოსყიდვას. ამით ოპოზიციური პარტიები დაკავებულები არ არიან, „ევროპული საქართველო“ ნამდვილად ამაში შემჩნეული არ ყოფილა და ეს არის ძალიან ნათელი გზავნილი ხელისუფლების მიმართ, „ქართული ოცნების“ მიმართ, რომ დარჩენილ დღეებში, ისევე როგორც არჩევნების დღეს, ხელი არ წაუცდეს და არ გამოიყენოს ისეთი ინსტრუმენტები, რომელიც ეჭქვეშ დააყენებს არჩევნების შედეგებს“, - განაცხადა კაპანაძემ.
ინფორმაციას "ევროპული საქართველოს" პრესსამსახური ავრცელებს.