დღევანდელმა თავდასხმამ უფლის სახლში, სიყვარულისა და ნუგეშის ადგილზე, სიკვდილი დათესა, ტერორიზმი და ძალადობა ვერასდროს გახდება მისაღები, - ამის შესახებ ვატიკანის პრესსპიკერის მატეო ბრუნის მიერ გავრცელებულ განცხადებაშია აღნიშნული.
მისივე თქმით, პაპი ფრანცისკე დაღუპულებისთვის ლოცულობს.
„პაპს იმედი აქვს, რომ ფრანგი ხალხი ბოროტს სიკეთით უპასუხებს,“- აცხადებს მატეო ბრუნი.
შეგახსენებთ, დღეს საფრანგეთის ქალაქ ნიცაში მდებარე ნოტრ-დამის ტაძარში დანით შეიარაღებული პირი მოქალაქეებს თავს დაესხა. დაღუპულია სამი და დაშავებულია რამდენიმე ადამიანი. გავრცელებული ინფორმაციით, ერთ-ერთ გარდაცვლილ ქალს თავი აქვს მოკვეთილი. სამართალდამცავებმა ეჭვმიტანილი დააკავეს. ნიცას მერმა კრისტიან ესტროსიმ მომხდარი ტერორიზმად შეაფასა. მისი თქმით, თავდამსხმელი დაკავებამდე და დაკავების შემდეგაც გამუდმებით იმეორებდა ფრაზას "ალაჰ აკბარ.“