კონფლიქტის ზონებში სამშვიდობოების განლაგება მხოლოდ ორივე დაპირისპირებული მხარის თანხმობით ხდება, - ამის შესახებ კრემლის პრესსპიკერმა დიმიტრი პესკოვმა სომხეთის პრემიერ-მინისტრ ნიკოლ ფაშინიანის განცხადებაზე კომენტირებისას აღნიშნა.
კითხვაზე, არის თუ არა რუსეთი მზად, აზერბაიჯანის მხრიდან თანხმობის შემთხვევაში მთიანი ყარაბაღის რეგიონში სამშვიდობოები გააგზავნოს, პესკოვმა განაცხადა, რომ „ამ საკითხზე სპეკულირებისგან“ თავს იკავებს.
„ამ მომენტში ამ საკითხზე სპეკულირებისგან თავს შევიკავებდი. პრეზიდენტი პუტინი კონფლიქტის გადაჭრასთან დაკავშირებული საკითხების ფართო სპექტრის განხილვას სომეხ და აზერბაიჯანელ კოლეგებთან აწარმოებს,“- განაცხადა პესკოვმა.
სომხეთის პრემიერ-მინისტრმა ნიკოლ ფაშინიანმა გამოცემა Telegraph-თან ინტერვიუში განაცხადა, რომ მთიან ყარაბაღში რუსი სამშვიდობოების განთავსება შესაძლოა, კონფლიქტის ოპტიმალური გადაწყვეტა იყოს. "მე მხარს ვუჭერ კონფლიქტის ზონაში რუსი სამშვიდობოების განთავსებას, მაგრამ პრობლემა ის არის, რომ ეს კონფლიქტის ყველა მხარისთვის მისაღები უნდა იყოს”, - აღნიშნა ნიკოლ ფაშინიანმა.