ბოლო სამი საათი მობილიზებული უნდა ვიყოთ, რათა დავიცვათ თითოეული ჩვენი ხმა, არავის არ უნდა მივცეთ უფლება, ჩვენი არჩევანი ვინმემ წაგვართვას, - ამის შესახებ „ლელო საქართველოსთვის“ თავმჯდომარემ, პრემიერ-მინისტრობის კანდიდატმა მამუკა ხაზარაძემ განაცხადა.

მისივე თქმით, საზოგადოება მხოლოდ სიმშვიდით აჯობებს იმ ქაოსსა და ჭაობს, რომელსაც „ქართულ ოცნება“ თავზე ახვევს.

„დღევანდელი არჩევნები ჩვენი ქვეყნისთვის უპრეცედენტოა. ეს არჩევნებია წარსულსა და მომავალს შორის, ჭაობსა და განვითარებას შორის, ეს არჩევნებია ჩვენი მომავალი თაობისთვის. ძალიან მნიშვნელოვანია, რომ თითოეული ჩვენთაგანი, ყველა ჩვენი მხარდამჭერი საარჩევნო უბანზე მეგობართან, ნათესავთან, ოჯახის წევრთან ერთად გამოცხადდეს, იმისთვის, რომ ჩვენი ქვეყნის განვითარება ბოლომდე მივიყვანოთ. ჩვენ ბოლო სამი საათი მობილიზებული უნდა ვიყოთ, რათა დავიცვათ თითოეული ჩვენი ხმა, არ უნდა მივცეთ არავის უფლება ჩვენი არჩევანი ვინმემ წაგვართვას. ამავე დროს, მინდა სიმშვიდისკენ მოგიწოდოთ, რადგან მხოლოდ სიმშვიდით ვაჯობებთ იმ ქაოსს, იმ ჭაობს, რომელსაც „ქართულ ოცნებას“ თავზე გვახვევს“, - განაცხადა ხაზარაძემ.