შინაგან საქმეთა სამინისტრო ადასტურებს, რომ „ნაცმოძრაობის" დამკვირვებელი ირაკლი ეძგვერაძე დაკავებულია. ამასთან, როგორც „ინტერპრესნიუსს" შს სამინისტროში განუცხადეს, არ დასტურდება ინფორმაცია, თითქოს გლდანში დაპირისპირებისას ცეცხლსასროლი იარაღიდან გასროლა მოხდა.

ცნობისთვის, „ნაციონალური მოძრაობის“ გლდანის რაიონის მაჟორიტარი დეპუტატობის კანდიდატის, ნიკა მელიას განცხადებით, "კრიმინალები და პოლიციელები ერთად მივარდნენ 84-ე საარჩევნო უბანთან".

„ვინმე დათო კვიჟინაძემ, რომელიც არის კახა კალაძის ბავშვობის მეგობარი, იარაღი ამოიღო, მოიყვანა საბრძოლო მოქმედებაში და დაუმიზნა იქ მყოფ ჩვენს დამკვირვებლებს. ამ დროს პოლიცია მივიდა და ჩვენი ოფიციალური დამკვირვებელი ირაკლი ეძგვერაძე დააკავეს", - განაცხადა მელიამ.