ყველას მოვუწოდებთ სიმშვიდისკენ, დაელოდონ დილამდე არჩევნების შედეგებს, ნახონ სად იქნება პირველი ტური, სად მეორე ტური და მოემზადონ, მოემზადონ ასევე მარცხის გაფორმებისთვის, - ამის შესახებ „ქართული ოცნების“ აღმასრულებელმა მდივანმა, ირაკლი კობახიძემ განაცხადა, რითაც გამოეხმაურა ოპოზიციის წარმომადგენლებს, რომლებიც ამ წუთებში ცენტრალური საარჩევნო კომისიის შენობასთან იკრიბებიან.

კობახიძის თქმით, ხელისუფლება საბოტაჟის საშუალებას არავის მისცემს.

„რატომ მიდიან ცესკოში? სასაცილოა. ამას აკეთებენ სულ 2016-ში, 2017-ში, 2018-ში, 2019-ში, ვერ მოიშალეს, 2012- შიც ამას აკეთებდნენ, ხელისუფლებაში რომ იყვნენ, მაგრამ ამისთვის აქ არის ხელისუფლება და სახელმწიფო. ბუნებრივია, საბოტაჟის და დესტრუქციის საშუალებას არავის არ მივცემთ. ყველას მოვუწოდებთ სიმშვიდისკენ, დაელოდონ დილამდე არჩევნების შედეგებს, ნახონ სად იქნება პირველი ტური, სად მეორე ტური და მოემზადონ, მოემზადონ ასევე მარცხის გაფორმებისთვის“, - განაცხადა კობახიძემ.

მისივე თქმით, დიდ ქალაქებში უმეტესად მეორე ტურები გაიმართება.

„თბილისში, უმეტეს შემთხვევაში არის მეორე ტურები მოსალოდნელი, ასევე სხვა დიდ ქალაქებში: ბათუმში, ქუთაისში და ასევე, არის ორი-სამი სხვა მუნიციპალიტეტი, სადაც მეორე ტური შედგება“, - განაცხადა კობახიძემ.

ცნობისთვის, ცენტრალური საარჩევნო კომისიის წინასწარი მონაცემებით, „ქართულ ოცნებას“ ხმების 54,72%, „ ერთიან ნაციონალურ მოძრაობას“ 23,61%, ხოლო „ევროპულ საქართველოს“ 3,99% აქვს. ცესკოს ინფორმაციით, 3847 უბნიდან მონაცემები დათვლილია 1 085 უბნის მიხედვით.