აქციის მონაწილეებმა პარლამენტის წინ კარავი გაშალეს. ოპოზიციის მხარდამჭერები და ლიდერების ნაწილი პარლამენტის წინ კვლავ რჩება, თუმცა პოლიტიკური განცხადებების გაკეთება დროებით შეჩერებულია.

კვლავ გადაკეტილია რუსთაველის გამზირი.

შეგახსენებთ, რომ საქართველოს პარლამენტის წინ აქცია 16:00 საათზე დაიწყო. აქციის მონაწილეები ითხოვენ, რომ არჩევნების შედეგების აღიარება არ მოხდეს.

ოპოზიციურად განწყობილი ამომრჩევლის პროტესტის მიზეზი ცესკოს მიერ გამოქვეყნებული საპარლამენტო არჩევნების პირველადი შედეგები გახდა.

ცნობისთვის, საქართველოში საპარლამენტო არჩევნები 2020 წლის ოქტომბერს ჩატარდა. ყველა უბნის დათვლის შედეგად ცესკოს წინასწარი მონაცემებით მმართველი პარტია "ქართული ოცნება" ლიდერობს, რომელმაც ამომრჩეველთა ხმების 48.15 % მოიპოვა. მეორე ადგილზე "ნაციონალური მოძრაობა" გავიდა, რომელსაც ამომრჩეველთა 27.14% უჭერს მხარს.

სხვა პარტიების შედეგები კი ასე ნაწილდება:

“ევროპული საქართველო - მოძრაობა თავისუფლებისთვის“ - 3.78%, "პატრიოტთა ალიანსი" - 3.14% , "სტრატეგია აღმაშენებელი” - 3.15% , “ლელო“ - 3.15% , “გირჩი“ – 2.89% , “ალეკო ელისაშვილი-მოქალაქეები“ - 1.33 % , "ლეიბორისტული პარტია" – 1%, „ერთიანი საქართველო-დემოკრატიული მოძრაობა“ -0.85%.