„ერთიანი ნაციონალური მოძრაობის" ერთ-ერთი ლიდერი, ხატია დეკანოიძე „ნაციონალური მოძრაობის“ მხარდამჭერებთან ერთად რუსთაველის გამზირზე ღამის გათენებას გეგმავს.

როგორც მან „ინტერპრესნიუსს“ განუცხადა, სანამ ერთი ადამიანი მაინც იქნება რუსთაველის გამზირზე და საპარლამენტო არჩევნების შედეგებს გააპროტესტებს, ისიც მათ გვერდით იქნება.

„სანამ ერთი ადამიანი მაინც იქნება რუსთაველის გამზირზე, რა თქმა უნდა, აქ ვიქნები. ნამდვილად ვერ დავტოვებ ამ ხალხს. ახლა კარავი არ გვაქვს გაშლილი, ახალგაზრდებთან ერთად ვდგავართ და ვსაუბრობთ. ჩემი პროტესტის გამოხატვის ფორმაა. პროტესტის გამოხატვის თავისუფლება გვაქვს, მათ შორის კანონი არ კრძალავს არც კარვის გაშლას და არც პროტესტის გამოხატვას. ამიტომ, სანამ ერთი ადამიანი მაინც გამოთქვამს პროტესტს, მეც აქ ვიქნები“,-განაცხადა დეკანოიძემ.

მისი თქმით, ადგილზე სიმშვიდეა და ახალგაზრდები არიან შეკრებილები.

ის ხელისუფლებას ურჩევს, აქციის მონაწილეების დაშლას არ შეეცადოს.

„ხელისუფლებას აქციის დაშლას არ ვურჩევდი“,-განაცხადა დეკანოიძემ.

„ერთიანი ნაციონალური მოძრაობის" ერთ-ერთმა ლიდერმა ხატია დეკანოიძემ არჩევნების შედეგების გამოცხადების შემდეგ, დღეს, ღამით რუსთაველის გამზირზე დარჩენა გადაწყვიტა. ოპოზიციის მხარდამჭერები დღეს ადგილზე კარვის გაშლას შეეცადნენ, თუმცა სამართალდამცავებმა ამის საშუალება არ მისცეს.