სომხეთი, 2 ნოემბერის დილის 06.00 საათიდან, აღდამისა და აღჯაბედის რაიონებს ბომბავს, - ამის შესახებ ინფორმაციას აზერბაიჯანული მედია ქვეყნის თავდაცვის სამინისტროზე დაყრდნობით ავრცელებს.
მათივე ინფორმაციით, გუშინ დღის განმავლობაში, ისევე როგორც 2 ნოემბრის ღამით სომხეთის შეიარაღებული ძალები აზერბაიჯანის არმიის შენაერთების პოზიციებს და დასახლებულ პუნქტებს სხვადასხვა იარაღის, მათ შორის არტილერიისა და რაკეტების გამოყენებით ესხმოდნენ თავს.
„საბრძოლო ოპერაციები ძირითადად აღდამის, ხოჯევანდისა და გუბადლის მიმართულებებით ხორციელდებოდა. ამ დროისთვის, ჩვენი ჯარები ოპერატიულ ვითარებას აკონტროლებენ“- აცხადებენ აზერბაიჯანის თავდაცვის უწყებაში.
შეგახსენებთ, სომხეთსა და აზერბაიჯანს შორის ვითარება 27 სექტემბერს დაიძაბა, რის შემდეგაც მთიან ყარაბაღში ცეცხლი არ წყდება. კონფლიქტს, ორივე მხრიდან, ასობით ადამიანის, მათ შორის მშვიდობიანი მოქალაქეების, სიცოცხლე ემსხვერპლა.