რუსეთის პრეზიდენტმა ვლადიმერ პუტინმა მთიანი ყარაბაღის კონფლიქტის შესახებ სომხეთის პრემიერ-მინისტრ ნიკოლ ფაშინიანსა და აზერბაიჯანის პრეზიდენტ ილჰამ ალიევთან ისაუბრა, - ამის შესახებ ინფორმაციას კრემლის პრესსამსახური ავრცელებს.

„მთიანი ყარაბაღის კონფლიქტის მოგვარებასთან დაკავშირებული საკითხები დეტალურად იქნა განხილული,“- ნათქვამია კრემლის მიერ გავრცელებულ განცხადებაში.

მათივე ინფორმაციით, ვლადიმერ პუტინსა და ნიკოლ ფაშინიანს შორის სატელეფონო საუბარი 1 ნოემბერს, პუტინსა და ილჰამ ალიევს შორის კი - 2 ნოემბერს გაიმართა.

შეგახსენებთ, სომხეთსა და აზერბაიჯანს შორის ვითარება 27 სექტემბერს დაიძაბა, რის შემდეგაც მთიან ყარაბაღში ცეცხლი არ წყდება. კონფლიქტს, ორივე მხრიდან, ასობით ადამიანის, მათ შორის მშვიდობიანი მოქალაქეების, სიცოცხლე ემსხვერპლა.