„სტრატეგია აღმაშენებლის" ლიდერი გიორგი ვაშაძე იმედოვნებს, რომ ხელისუფლება „გონს მოუხმობს" და ნიკა მელიას არ დააკავებს. როგორც მან ჟურნალისტებს განუცხადა, მმართველი გუნდი ცდილობს, ამ გზით ოპოზიცია გატეხოს. თუმცა, ვაშაძის თქმით, ეს ფაქტი ოპოზიციას კიდევ უფრო გააერთიანებს.

„17:00 საათზე მეც ვიქნები სასამართლოში. შეშინებული „ოცნება" ახლა ფიქრობს, რომ თავდასხმაზე გადმოსვლით ვინმეს გაგვტეხს, პირიქით, ეს უფრო გაგვაერთიანებს,უფრო ერთიანები და ძლიერები ვიქნებით. იმედია, გონს მოუხმობენ და დღეს დაკავებაზე არ წავლენ", - განაცხადა ვაშაძემ.

ცნობისთვის, გენერალურმა პროკურატურამ „ნაციონალური მოძრაობის“ ერთ-ერთი ლიდერის, ნიკა მელიასთვის აღკვეთის ღონისძიების შეცვლასთან დაკავშირებით საქალაქო სასამართლოს მიმართა. პროცესი 17:00 საათზეა დანიშნული.

შეგახსენებთ, ნიკა მელიას 20 ივნისის საქმეზე აღკვეთის ღონისძიების სახით გირაო აქვს შეფარდებული. ასევე, სასამართლოს გადაწყვეტილებით, მას ელექტრონული სამაჯური ეკეთა, თუმცა „ნაციონალური მოძრაობის“ ერთ-ერთმა ლიდერმა, პროკურატურის მიერ დამაგრებული ელექტრონული სამაჯური 1-ელ ნოემბერს, საჯაროდ, რუსთაველის გამზირზე მიმდინარე საპროტესტო აქციაზე მოიხსნა.