საქართველო მკაცრად გმობს ვენაში განხორციელებულ საზარელ ტერორისტულ აქტს, - ამის შესახებ საქართველოს პრემიერ-მინისტრი გიორგი გახარია სოციალურ ქსელ „ტვიტერში“ წერს.
მისივე თქმით, საქართველო ტერორიზმის წინააღმდეგ ბრძოლაში ავსტრიისა და მთელი მსოფლიოს გვერდით დგას.
„საქართველო მკაცრად გმობს ვენაში განხორციელებულ საზარელ ტერორისტულ აქტს. სამძიმარს ვუცხადებთ ამ საშინელი თავდასხმის დროს დაღუპულების ოჯახებსა და მეგობრებს, დაშავებულებს კი სწრაფად გამოჯანმრთელებას ვუსურვებთ. ტერორიზმის წინააღმდეგ ბრძოლაში ავსტრიელებისა და მთელი მსოფლიოს გვერდით ვდგავართ,“-წერს გიორგი გახარია.
შეგახსენებთ, ავსტრიის დედაქალაქ ვენაში გუშინ განხორციელებული თავდასხმის შედეგად გარდაცვლილია ოთხი ადამიანი – ორი ქალი და ორი მამაკაცი. ქვეყნის შინაგან საქმეთა მინისტრმა კარლ ნეჰამერმა დღეს დილით გამართულ პრესკონფერენციაზე განაცხადა, რომ მომხდარი თავდასხმა სულ მცირე ერთმა ისლამისტმა ტერორისტმა განახორციელა. მისივე თქმით, პოლიციამ მძიმედ შეიარაღებული თავდამსხმელის ლიკვიდაცია განახორციელა, რომელიც ექსტრემისტული დაჯგუფება „ისლამური სახელმწიფოს“ მომხრე იყო.