კორონავირუსის გავრცელების შეჩერების მიზნით უნგრეთში დღეიდან ბარები და გასართობი დაწესებულებები იხურება და ღამის ე.წ. კომენდანტის საათი წესდება, - მედიის ინფორმაციით, ამის შესახებ ქვეყნის პრემიერ-მინისტრმა ვიქტორ ორბანმა სოციალურ ქსელ „ფეისბუქში“ გავრცელებულ ვიდეო მიმართვაში განაცხადა.
მისი თქმით, ქვეყანაში "სპეციალური სამართლებრივი წესრიგი" წესდება და მთავრობა პარლამენტს მისი 90 დღით გახანგრძლივების თხოვნით მიმართავს.
აღსანიშნავია, რომ უნგრეთში სკოლები კვლავ ღია რჩება. ამ ეტაპზე მთავრობა არც მაღაზიებისა და რესტორნების დახურვას გეგმავს.
ამასთან, პირები, ვინც პირბადის ტარების წესებს დაარღვევენ, მკაცრად დაჯარიმდებიან. წესების დამრღვევ რესტორნებსა და მაღაზიებს კი დახურვა ემუქრებათ.
ცნობისათვის, უნგრეთში გასული დღის განმავლობაში კორონავირუსის 3 989 ახალი შემთხვევა დადასტურდა და 84 ადამიანი გარდაიცვალა. საერთო ჯამში, ქვეყანაში კორონავირუსით ინფიცირების 86 769 შემთხვევაა გამოვლენილი, გარდაცვლილია 1 973 ადამიანი.