მცხეთის საოლქო საარჩევნო კომისიამ ერთ უბანზე შემაჯამებელი ოქმი გააუქმა, რასაც თავმჯდომარის და მდივნის დისციპლინური პასუხისმგებლობა მოჰყვა, მარნეულის და სამგორის ოლქების კონკრეტულ უბნებზე კი, ოქმები ჩასწორდა.

ცენტრალური საარჩევნო კომისიის ადამიანური რესურსების დეპარტამენტის უფროსის, გიორგი კალანდარიშვილის განცხადებით, #27 მცხეთის საოლქო საარჩევნო კომისიამ #11.27.46 საუბნო საარჩევნო კომისიის თავმჯდომარისა და კომისიის მდივნის მიმართ დისციპლინური პასუხისმგებლობის ზომა გამოიყენა.

როგორც კალანდარიშვილმა ბრიფინგზე განმარტა, აღნიშნულ უბანზე ოქმის შევსებისას დაშვებულმა შეცდომებმა შემაჯამებელი ოქმის გაუქმების საფუძველი შექმნა.

„გვსურს გაგიზიაროთ ინფორმაცია საოლქო საარჩევნო კომისიების იმ გადაწყვეტილებების შესახებ, რომელიც ეხება ინტერნეტსივრცეში გავრცელებულ ზოგიერთ შემაჯამებულ ოქმს. #27 მცხეთის საოლქო საარჩევნო კომისიამ #11.27.46 საუბნო საარჩევნო კომისიის მაჟორიტარული საარჩევნო სისტემით კენჭისყრის შედეგების შემაჯამებელი ოქმი ბათილად ცნო. შესაბამისი განკარგულება საოლქო საარჩევნო კომისიამ 3 ნოემბერს გამართულ სხდომაზე მიიღო. გადაწყვეტილების მიღებამდე კომისიამ დეტალურად შეისწავლა საკითხი, მიიღო ახსნა-განმარტება საუბნო საარჩევნო კომისიის თავმჯდომარისა და კომისიის მდივნისგან. მათ განმარტეს ოქმში დაშვებული შეცდომების მიზეზები, თუმცა ამის მიუხედავად საოლქო საარჩევნო კომისიამ მიიჩნია, რომ ოქმის შევსებისას დაშვებული შეცდომები იმდენად მნიშვნელოვანი იყო, რომ შემაჯამებელი ოქმი უნდა გაუქმებულიყო. შემაჯამებელი ოქმის ბათილად ცნობასთან ერთად საოლქო საარჩევნო კომისიამ #11.27.46 საუბნო საარჩევნო კომისიის თავმჯდომარისა და კომისიის მდივნის მიმართ დისციპლინური პასუხისმგებლობის ზომა გამოიყენა“, - განაცხადა კალანდარიშვილმა.

რაც შეეხება მარნეულის N13.22.67 საარჩევნო უბანს, სადაც წევრებმა დადგენილი წესით შეადგინეს შემაჯამებელი ოქმი, უფლებამოსილ პირებზე გასცეს ამ ოქმის ასლი, რის შემდეგაც ოქმში ცვლილება გაურკვეველ ვითარებაში მოხდა, კალანდარიშვილმა აღნიშნა, რომ საარჩევნო ადმინისტრაციამ საკუთარი ინიციატივით გადაწყვიტა საკითხის შესწავლა, ვინაიდან აღნიშნული ოქმი არავის გაუსაჩივრებია.

„3 ნოემბერს, უფლებამოსილ პირებზე გაცემული დამოწმებული შემაჯამებელი ოქმის ასლის და ასევე საუბნო საარჩევნო კომისიის წარმომადგენლების განმარტებების საფუძველზე, საოლქო საარჩევნო კომისიამ განკარგულებით მიიღო გადაწყვეტილება საოქმო მონაცემების ცვლილების თაობაზე. აღნიშნული კი არის პირველი ოქმის იდენტური და ასახულია ცესკოს შედეგების ვებგვერდზე“, - განაცხადა კალანდარიშვილმა.

ამასთან, მანვე განმარტა, რომ #6 სამგორის საოლქო საარჩევნო კომისიამ #05.06.97 საუბნო საარჩევნო კომისიის პროპორციული და მაჟორიტარული ბიულეტენები გადათვალა და კენჭისყრის შედეგების შემაჯამებელ ოქმებში ცვლილებები შეიტანა.

„აღნიშნულ უბანზე სადემონსტრაციო ოქმი, რომელიც საჯაროა სწორად იყო შევსებული, თუმცა მონაცემების გადატანისას დაშვებული იქნა შეცდომა. ეს ფაქტი ნათლად ადასტურებს, რომ აღნიშნულ უბანზე მიზანმიმართულად არ მომხდარა ოქმებში არასწორი მონაცემების დაფიქსირება და მომხდარი მხოლოდ ადამიანური შეცდომის ფაქტორით არის განპირობებული. სწორედ აღნიშნული შეცდომის გამო იქნა მიღებული გადათვლის გადაწყვეტილება, რის შედეგად შემაჯამებელ ოქმებში შეიცვალა მონაცემები. #05.06.97 საარჩევნო უბნის შედეგთან დაკავშირებით “სამართლიანმა არჩევნებმა” წარადგინა საჩივარი, რომლის საფუძველზეც მიღებულ იქნა ზემოხსენებული გადაწყვეტილება. თუმცა აღსანიშნავია, რომ საარჩევნო ადმინისტრაცია უკვე ინფორმირებული იყო ხარვეზის თაობაზე და საჩივრის არარსებობის შემთხვევაშიც განახორციელებდა შესაბამის რეაგირებას“, - განაცხადა კალანდარიშვილმა.