"ევროპული საქართველოს" კომისიის წევრმა ისნის მე-5 საოლქო საარჩევნო კომისიის სხდომა პროტესტის ნიშნად დატოვა. როგორც სხდომიდან გამოსულმა ნანა მინასენმა ჟურნალისტებს განუცხადა, საჩივრების განხილვა ფორმალურად მომდინარეობდა, არცერთი საჩივარი არ დაკმაყოფილდა, რის გამოც პროტესტის ნიშნად საჩივრების განხილვის პროცედურა დატოვა.
როგორც მან განმარტა, შეიძლება "ისნის საარჩევნო ოლქში არჩევნები არ ჩატარებულა".
"სხდომა პროტესტის ნიშნად დავტოვე, რადგანაც მივუტანე ოქმები, რომლებიც არ შეესაბამება სიმართლეს. ვითხოვე ამ ოქმების გადამოწმება, რაზეც მივიღე უარი. გააძევეს დამკვირვებელი, მედიის წარმომადგენლები. ყველაფერს აკეთებენ იმისთვის, რომ არ მოხდეს ამ უბნების გადათვლა ხელმეორედ", განაცხადა ნანა მინასენმა.
პარალელურად კომისიის შენობასთან "ლელოს", "სტრატეგია აღმაშენებლის" აქტივისტები და ოპოზიციის წარმომადგენლები აქციას მართავენ, ისინი აცხადებენ, რომ 2020 წლის საპარლამენტო არჩევნები გაყალბდა.