კოსოვოს პრეზიდენტმა, ჰაშიმ ტაჩიმ თანამდებობიდან გადადგომის გადაწყვეტილება მიიღო. მედიის ინფორმაციით, მან ეს გადაწყვეტილება მას შემდეგ მიიღო, რაც ჰააგის სპეციალურმა სასამართლომ მისთვის ომის დანაშაულის გამო ბრალის წაყენების გადაწყვეტილება დაადასტურა.

კოსოვოს საკითხებზე მომუშავე საგანგებო პროკურატურამ, ჰაშიმ ტაჩის ბრალი სავარაუდო ომის დანაშაულისა და კაცობრიობის წინააღმდეგ დანაშაულის, მათ შორის 100-მდე მკვლელობის შემთხვევის გამო ივნისში წარუდგინა.

ივნისში პრეზიდენტმა პირობა დადო, რომ თანამდებობიდან გადადგებოდა, თუკი სასამართლო დაადგენდა, რომ პროცესის დასაწყებად საქმეში საკმარისი მტკიცებულებები არსებობს. თუმცა, ამასთან იგი ბრალდებებს უარყოფს.

„მე არავითარ შემთხვევაში არ დავუშვებ, რომ სასამართლოს წინაშე კოსოვოს რესპუბლიკის პრეზიდენტის რანგში წარვსდგე. შესაბამისად, პრეზიდენტის აპარატის და ქვეყნის მთლიანობის, აგრეთვე მოქალაქეთა ღირსების დასაცავად, მე გადავდექი კოსოვოს რესპუბლიკის პრეზიდენტის თანამდებობიდან ”, - განუცხადა მან ჟურნალისტებს.

ტაჩი პრეზიდენტის პოსტს 2016 წლიდან იკავებდა. მანამდე ის პრემიერ-მინისტრი იყო. როგორც „ევრონიუსი“ წერს ის ერთ-ერთი პარტიზანი ლიდერი იყო 1990-იან წლებში სერბეთისგან კოსოვოს დამოუკიდებლობისთვის ბრძოლაში.