ლატვიაში 9 ნოემბრიდან საყოველთაო კარანტინი ცხადდება, - ამის შესახებ ინფორმაციას Reuters-ი ავრცელებს.

სააგენტოს ცნობით, კარანტინის ფარგლებში დაწესებული შეზღუდვების თანახმად, ქვეყანაში დახურულ სივრცეში 10-ზე მეტი პირის შეკრება იკრძალება. აღსანიშნავია, რომ შეკრებილი ადამიანები ორზე მეტი სხვადასხვა ოჯახის წევრები არ უნდა იყვნენ.

ამასთან, რესტორნებს მხოლოდ გატანის სერვისის შეთავაზების უფლება ექნებათ. მაღაზიები კი ვალდებულები იქნებიან, შენობაში ერთდროულად მხოლოდ შეზღუდული რაოდენობის მომხმარებლები დაუშვან.

ლატვიაში კარანტინი 4 კვირის განმავლობაში იქნება ძალაში.

ცნობისათვის, ქვეყანაში, გასული დღე-ღამის განმავლობაში კორონავირუსის 367 ახალი შემთხვევა გამოვლინდა და ინფიცირებულთა საერთო რაოდენობა 7 119-მდე გაიზარდა. ლატვიაში კოვიდ 19-ს დღემდე 87 ადამიანის სიცოცხლე ემსხვერპლა.