ისნის საოლქო საარჩევნო კომისიის თავმჯდომარის გარდაცვალების საქმეზე დაკავებული ერთ-ერთი პირის აკაკი ხუსკივაძის ადვოკატის თამარ ქუთათელაძის განცხადებით, ვაკე-საბურთალოს პოლიციის განყოფილებაში მისი დაცვის ქვეშ მყოფი შეუძლოდ გახდა, რის გამოც სასწრაფო გამოიძახეს. ადვოკატის ინფორმაციით, აკაკი ხუსკივაძე საბურთალოს პოლიციასთან მისი ავტომობილის ჩხრეკის დასრულების შემდეგ დააკავეს.
"განსაკუთრებული ცინიზმით გამოირჩევიან პოლიციის თანამშრომლები. ადამიანი ცუდად იყო. არ აპირებდნენ სასწრაფოს გამოძახებას, მე შევატყობინე ხალხს გარეთ რომ ცუდად იყო. ბრალდებული ისე წაიყვანეს, დაკავების ოქმი არ გადასცეს არც მას და არც მეც. ბრალის დადგენილებაც არ გადმოგვცეს. საერთოდ, ბრალდებულის უფლებებიც მე წავუკითხე, პოლიციას ამის სურვილი და ვალდებულება თურმე არ ჰქონდა",-აცხადებს თამარ ქუთათელაძე.
შეგახსნებთ, ისნის საოლქო საარჩევნო კომისიის თავმჯდომარის, თედო გობეჯიშვილის გარდაცვალების საქმეზე აკაკი კობალაძე და აკაკი ხუსკივაძე დააკავეს. ადვოკატების ინფორმაციით, დაკავებულებს ვაკე-საბურთალოს პოლიციის განყოფილებაში ბრალი წარუდგინეს ქრთამის შეთავაზებისა და მუქარის მუხლებით.
ისნის საოლქო საარჩევნო კომისიის თავმჯდომარის გარდაცვალების ფაქტზე შინაგან საქმეთა სამინისტრომ გამოძიება დღეს დაიწყო.