რუსთაველის გამზირზე, საქართველოს პარლამენტის წინ დღეს დაგეგმილი საპროტესტო აქციისთვის ემზადებიან. ადგილზე სცენის მოწყობა მიმდინარეობს.

,,ნაციონალური მოძრაობის” ერთ-ერთი ლიდერის, ზაალ უდუმაშვილის განცხადებით, რუსთაველის მოედანზე ათი ათასობით ადამიანს ელოდებიან და გამოვა ყველა ის ადამიანი ვინც თვლის, რომ არჩევნები წაართვეს.

,,ნამდვილად არ გვაქვს დათვლილი ხალხის რაოდენობა, ყველა პოლიტიკური პარტიის მხარდამჭერი იდგება აქ, მაგრამ არ არის საუბარი მხოლოდ პოლიტიკური პარტიის მხარდამჭერებზე, გამოვა ყველა ის ადამიანი, ვინც თვლის, რომ მას არჩევნები წაართვეს. ეს იქნება ათი ათასობით ადამიანი.

მაქსიმალურად შევეცდებით, რომ დავიცვათ ყველა ის წესი, რომელსაც ითვალისწინებს რეგულაციები კოვიდთან დაკავშირებით. დარიგდება პირბადეები, მაქსიმალურად მოვუწოდებთ ხალხს, რომ დისტანცია დაიცვან. ,,ქართულმა ოცნებამ” დააწესა შეზღუდვები იმისათვის, რომ ქუჩაში არ გამოვიდეს ხალხი და არა კოვიდთან საბრძოლველად, ეს ნამდვილად ვერ შეაჩერებს დღეს ხალხის პროტესტს”, - აღნიშნა ზაალ უდუმაშვილმა.

სხვადასხვა ოპოზიციური პარტია დღეს, თბილისში, სხვადასხვა ლოკაციაზე შეიკრიბება, საიდანაც ისინი მსვლელობით პარლამენტის წინ მივლენ. მანამდე კი, დედაქალაქისკენ რეგიონებიდან ავტოკოლონები დაიძვრება. საპროტესტო აქცია რუსთაველის გამზირზე, 15:00 საათზე დაიწყება.