ოპოზიციამ სათანადო რაოდენობით ადამიანების შეკრება ვერ მოახერხა,- ამის შესახებ “ქართული ოცნების” აღმასრულებელმა მდივანმა ირაკლი კობახიძემ ჟურნალისტებთან განაცხადა, რითაც პარლამენტთან გამართულ აქციას გამოეხმაურა.
კობახიძე ვარაუდობს, რომ ამ ფონზე საქართველოს პარლამენტში მეტი პარტია შევა.
„გამყარდა ვარაუდი, რომელიც გვქონდა პარტიების პარლამენტში შემოსვლასთან დაკავშირებით, პროცესები რაც დღეს წარიმართა, ვგულისხმობ იმას, რომ ვერ მოახერხა ოპოზიციამ სათანადო რაოდენობით ადამიანების შეკრება, ბუნებრივია, დამატებით შეუწყობს ხელს იმას, რომ რაც შეიძლება მეტი პარტია შემოვა საქართველოს პარლამენტში. ეს სჭირდება არა „ქართულ ოცნებას“ და საქართველოს ხელისუფლებას, არამედ ეს სჭირდება ქართველ ხალხს და ქართულ დემოკრატიას. მრავალპარტიული პარლამენტი არის იმ პროცესის შედეგი, რომელიც უკავშირდებოდა საარჩევნო სისტემის რეფორმას, რაც ჩვენი საერთაშორისო პარტნიორების ძალიან სერიოზული ძალისხმევის შედეგია და ეს ყველაფერი სჭირდება ქართულ დემოკრატიას, სწორედ ამისთვის არის საჭირო მრავალპარტიული პარლამენტი და მრავალპარტიული პარლამენტი საქართველოში აუცილებლად შედგება“, - განაცხადა კობახიძემ.