"ნაციონალური მოძრაობის" ერთ-ერთი ლიდერის ზაალ უდუმაშვილის განცხადებით, ცესკო-ს შენობასთან პროტესტის გამოხატვის მიზნით დადგებიან, ვიდრე თანამდებობებს არ დატოვებენ „ცესკოს თავმჯდომარე და მთელი მისი ბანდა, რომლებიც 2020 წლის არჩევნების გაყალბებებში მონაწილეობდნენ". ამის შესახებ უდუმაშვილმა ჟურნალისტებს ცესკოსთან აქციაზე განუცხადა.
"ხალხი დგას ცესკო-სთან და ეუბნებიან დაიშალეთო. ამათ შიშისგან მუხლები უკანკალებთ. ეს არის ის ბოლო ნაბიჯები, რაც ხელისუფლებას შერჩა. თითქოს ძალის დემონსტრირება სურთ. ეს მათი სისუსტის დემონსტრირებაა, ხელისუფლება პრაქტიკულად ჩამოშლილია. სამოქმედო გეგმა არის პროტესტი. პროტესტია ის ერთადერთი გზა, რომელიც ბიძინა ივანიშვილმა დაგვიტოვა", - განაცხადა ზაალ უდუმაშვილმა.
შეგახსენებთ, რომ ცოტა ხნის წინ აქციის მონაწილეები პოლიციამ წყლის ჭავლის გამოყენებით დაშალა. არსებული ინფორმაციით, დაშავდა რამდენიმე ადამიანი.