ისნის საოლქო საარჩევნო კომისიის თავმჯდომარის, თედორე გობეჯიშვილის გარდაცვალების ფაქტთან დაკავშირებით, აკაკი ხუსკივაძე და აკაკი კობალაძე სუს-ის დაკვეთით არიან დაკავებული, - ამის შესახებ „ნაციონალური მოძრაობის" წევრმა ლევან ბეჟაშვილმა თბილისის საქალაქო სასამართლოში განაცხადა.
მისივე თქმით, გარდაცვლილი და ბრალდებულები ახლობლები იყვნენ და პოლიციამ გაუგონარი, არაადამიანური ბრალდება წარადგინა.
„ყველამ კარგად იცის, რომ ხუსკივაძესა და კობალაძის მიმართ პოლიციამ მართლა გაუგონარი, არაადამიანური ბრალდება წარადგინა. ბუნებრივია, სუს-ის დაკვეთით, რადგან ყველამ კარგად იცის, რომ ოჯახის წევრები და ახლობლები იყვნენ ერთმანეთის. ეს ბრალდება ყველაზე მძიმეა მათთვის მორალური თვალსაზრისითაც. „ქართული ოცნება" ყველაფარის მკადრებელია, რომ თავისი ვიწრო პოლიტიკური ინტერესი დაიკმაყოფილოს“, - განაცხადა ბეჟაშვილმა.
ცნობისთვის, თედორე გობეჯიშვილის გარდაცვალების ფაქტთან დაკავშირებით, ორი პირი, აკაკი ხუსკივაძე და აკაკი კობალაძე დააკავეს. მათ სისხლის სამართლის კოდექსის 150-ე, 151-ე და 339-ე მუხლებით გათვალისწინებული დანაშაულის ჩადენას ედავებიან, რაც იძულებას, მუქარასა და ქრთამის შეთავაზებას გულისხმობს.