რუსთაველის გამზირზე სამართალდამცველებმა ორი მოქალაქე დააჯარიმეს. ერთ-ერთი მათგანი ქალთა უფლებებისაქტივისტი, თეოლოგი რუსუდან გოცირიძეა.
სამართალდამცველებმა მას გადაადგილებაზე დაწესებული შეზღუდვის დარღვევისთვის 2 ათას ლარიანი ჯარიმა გამოუწერეს.
როგორც გოცირიძემ „ინტერპრესნიუსს“ განუცხადა, ის რუსთაველის გამზირზე ერთ-ერთი ტელევიზიის საველე სტუდიაში იყო მიწვეული და მათ მიერ გაფორმებული მოწვევა და საშვი ჰქონდა. თუმცა, როგორც მან აღნიშნა, სამართალდამცველებმა აღნიშნული საშვი საკმარისად არ მიიჩნიეს და როდესაც რუსთაველის გამზირიდან სახლში ბრუნდებოდა, პოლიციის თანამშრომლებმა დააჯარიმეს.
ცოტა ხნის წინ სამართალდამცავებმა ასევე დააჯარიმეს “ნაციონალური მოძრაობის“ წევრი ხატია დეკანოიძე, რომელიც აცხადებს, რომ წესებს არ დაემორჩილება.
ცნობისთვის, თბილისში, ქუთაისში, ბათუმში, რუსთავში, ზუგდიდში, გორსა და ფოთში 22:00 საათიდან დილის 5:00 საათამდე გადაადგილების თაობაზე შეზღუდვა ძალაში შევიდა.
შინაგან საქმეთა სამინისტროს ინფორმაციით, ყველა იმ პირს, რომელიც 22:00 საათიდან გადაადგილებაზე დაწესებულ შეზღუდვას არღვევს, 2 000-ლარიანი ჯარიმა დაეკისრება.
როგორც „ინტერპრესნიუსს“ შსს-ში, განუცხადეს, ხდება ყველა იმ პირის იდენტიფიცირება, ვინც კანონს არღვევს.