აშშ-ის პრეზიდენტის დონალდ ტრამპის პრესსპიკერი კეილი მაკინანი აცხადებს, რომ ჯო ბაიდენის გამარჯვების წინააღმდეგ სამართლებრივი ბრძოლა მხოლოდ ეს- ესაა დაიწყო.

„არჩევნები ჯერ არ დასრულებულა. მანამდე ჯერ შორია. ჩვენ ეს-ესაა დავიწყეთ პროცესი, ზუსტად, პატიოსნად ხმების დათვლის მისაღწევად,“ - აღნიშნა თეთრი სახლის პრესსპიკერმა.

მისი მტკიცებით, არჩევნების „რესპუბლიკელ“ დამკვირვებლებს პენსილვანიის შტატის ქალაქ ფილადელფიაში ხმების დათვლაზე ადეკვატური წვდომა არ ჰქონდათ.

აღსანიშნავია, რომ დონალდ ტრამპის საარჩევნო შტაბმა პენსილვანიის ფედერალურ სასამართლოში გუშინ სარჩელი შეიტანა და მოითხოვა საგანგებო განკარგულება, რომელიც შტატის ოფიციალურ პირებს აიძულებს, შტატში ჯო ბაიდენის გამარჯვების აღიარება შეწყვიტონ. შტატის გენერალურმა პროკურორმა ჯოშ შაპირომ სარჩელს "უღირსი" უწოდა.