რუსთაველის გამზირზე, პარლამენტის წინ მიმდინარე საპროტესტო აქციაზე ადმინისტრაციული წესით დაკავებული პირების, ნოდარ რუხაძისა და გიორგი მჟავანაძის სასამართლო პროცესი მიმდინარეობს.

რაც შეეხება კიდევ ერთ დაკავებულს, ლექსო მაჭავარიანს, მის საქმეზე მოსამართლემ პოლიციას ერთი საათი მისცა დამატებითი მტკიცებულებების წარსადგენად. როგორც დაკავებულების ადვოკატმა, ედუარდ მარიკაშვილმა განაცხადა, მოსამართლემ პოლიციას დაავალა წარმოადგინოს ფაქტები იმის შესახებ, ოდესმე, აქტივისტებს გამოუყენებიათ თუ არა შეშა, როგორც დანაშაულის იარაღი. მარიკაშვილის თქმითვე, ლექსო მაჭავარიანი სწორედ იმ დროს დააკავეს, როცა პარლამენტთან აქციის მონაწილეებისთვის შეშა უნდა შეეტანა.

ცნობისთვის, პარლამენტთან 4 პირი ადმინისტრაციულ სამართალდარღვევათა კოდექსის 166-ე და 173-ე მუხლების საფუძველზე დააკავეს, რაც პოლიციისადმი დაუმორჩილებლობასა და წვრილმან ხულიგნობას გულისხმობს.