საქართველოს წითელი ჯვრის საზოგადოება მოქალაქეების ფსიქოლოგიურ დახმარებას განაგრძობს. მათი ინფორმაციით, მოქალაქეების საჭიროებებზე რეაგირების მიზნით სატელეფონო ნომრები დაემატა.
"პანდემიის პერიოდში, საქართველოს წითელი ჯვრის საზოგადოება განაგრძობს მოქალაქეების ფსიქოლოგიურ პირველად დახმარებას და საჭიროებებზე სწრაფი რეაგირებისთვის გთავაზობთ დამატებით სატელეფონო ნომრებს. უფასო ფსიქოლოგიური კონსულტაციის მისაღებად მიმართეთ საქართველოს წითელი ჯვრის საზოგადოებას განახლებულ ცხელ ხაზზე (032) 2 501 105.
გარდა ცხელი ხაზისა, ფსიქოლოგებთან დასაკავშირებლად დარეკეთ ნომრებზე: 591 910 040 (ორშ./სამშ./პარ. 10:00-18:00 სთ), 591 910 045 (ოთხშ./ხუთშ. 10:00-18:00 სთ). ცხელი ხაზზე, ასევე შესაძლებელია ინფორმაციის მიღება COVID-19-ის შესახებ, მსუბუქი შემთხვევების დისტანციური მონიტორინგი თვითიზოლაციის დროს და გადამისამართება შესაბამის სახელმწიფო თუ არასახელმწიფო სერვისებში, მათ შორის, საქართველოს წითელი ჯვრის ფსიქიკური ჯანმრთელობისა და ფსიქოსოციალური დახმარების საკოორდინაციო პლატფორმაზე შემავალ ფსიქიკური ჯანმრთელობის სხვა სერვისებში.
COVID-19-ის გავრცელების პირველივე დღეებიდან, საქართველოს წითელი ჯვრის საზოგადოების ინიციატივით შექმნილი ფსიქიკური ჯანმრთელობისა და ფსიქოსოციალური დახმარების საკოორდინაციო პლატფორმა აერთიანებს სამთავრობო/არასამთავრობო ორგანიზაციებსა და პროფესიულ ჯგუფებს, რომლებიც მოსახლეობას ფსიქიკური ჯანმრთელობისა და ფსიქოსოციალურ დახმარებას უფასოდ სთავაზობენ. პლატფორმის ფარგლებში ფუნქციონირებს რამდენიმე ცხელი ხაზი, სერვისები ბავშვებისთვის, მოზარდებისთვის, ოჯახური ძალადობის მსხვერპლთათვის, ფსიქიკური ჯანმრთელობის პრობლემების მქონე პირებისთვის და სხვადასხვა მოწყვლადი ჯგუფისთვის. პლატფორმის ფარგლებში, ასევე მიმდინარეობს იდეების, მიდგომების, გამოცდილებისა და ფსიქოსაგანმანათლებლო მასალის გაზიარება",-აღნიშნულია ინფორმაციაში.