ფეხბურთელ გიორგი შაქარაშვილის საქმეზე დაკავებული 8 პირის სასამართლო პროცესზე 4 მოწმე დაიკითხა. როგორც საქმის პროკურორმა ვახტანგ ცალუღელაშვილმა განაცხადა, 4 მოწმიდან 3 გამომძიებელი იყო, ერთი კი ექსპერტი.
„გამომძიებლებმა ისაუბრეს იმ საგამოძიებო მოქმედებებთან დაკავშირებით, რაც მათ ჩაატარეს და დაადასტურეს მათ მიერ ჩატარებული საგამოძიებო მოქმედებების შინაარსი და სისწორე. ხოლო ექსპერტმა, რომელმაც მონაწილეობა მიიღო საგამოძიებო ექსპერიმენტებში, დათვალიერების ოქმებში, ისაუბრა მის მიერ, როგორც ექსპერტის მიერ ჩატარებულ მოქმედებებზე",- განაცხადა ცალუღელაშვილმა.
ცნობისთვის, ფეხბურთელ გიორგი შაქარაშვილის გარდაცვალების საქმეზე დაკავებულ 8 პირს ჯგუფურ ძალადობას, ძალადობის ორგანიზებას, მასში მონაწილეობასა და თავისუფლების უკანონო აღკვეთას ედავებიან.
შემდეგი სასამართლო პროცესი 12 ნოემბერს, 14:00 საათზე გაიმართება.
იხილეთ ვიდეო: გიორგი შაქარაშვილის საქმეზე დაკავებული 6 არასრულწლოვნის პროცესი დღეს გაგრძელდება