ვიდრე გონს არ მოვა ივანიშვილი, მანამდე გაგრძელდება სამოქალაქო პროტესტი, - ამის შესახებ „ევროპული საქართველოს" ერთ-ერთმა ლიდერმა გიგა ბოკერიამ ჟურნალისტებს განუცხადა.

როგორც ბოკერიამ აღნიშნა, დიალოგის მეშვეობით უნდა მოხდეს ახალი არჩევნების ნორმალურ ვითარებაში ჩატარების შეთანხმება.

„სანამ გონს არ მოვა ივანიშვილი, რომ ამ არანორმალური ვითარების შენარჩუნება, რომელიც მიღწეულია არალეგალური, ძალადობრივი მანიპულაციის მეთოდებით, ვერ მოხდება, მანამდე გაგრძელდება სამოქალაქო მშვიდობიანი პროტესტი. როცა მოვა გონს, მაშინ დიალოგის მეშვეობით უნდა მოხდეს ახალი არჩევნების ნორმალურ ვითარებაში ჩატარების შეთანხმება",- განაცხადა ბოკერიამ.

ამასთან, ბოკერია გამოეხმაურა გრიგოლ ვაშაძის განცხადებას.

„ერთმა ცნობილმა ჟურნალისტმა და სამოქალაქო კომენტატორმა იხუმრა: „მიმითითეთ თუ შეიძლება სად არის ბატონი ვაშაძის მეორე განცხადების დაზუსტების ოქმიო". ამით ყველაფერი ნათქვამია. თუ მისი პოზიცია მყარია და საბოლოო ამ საკითხზე, კარგია. ჩვენი, „ევროპული საქართველოს" პოზიცია მყარია და დაზუსტებებს არ საჭიროებს",- განაცხადა ბოკერიამ.