აშშ-ს სახელმწიფო მდივანმა მაიკ პომპეომ განაცხადა, რომ ყველა კანონიერი ხმის დათვლას შედეგად დონალდ ტრამპის მეორე ადმინისტრაცია მოჰყვება, - ამის შესახებ ინფორმაციას Reuters-ი ავრცელებს.

სააგენტოს ცნობით, მოგვიანებით სახელმწიფო მდივანმა "ტონი შეიცვალა" და აღნიშნა, რომ დარწმუნებულია, ვინც არ უნდა გახდეს აშშ-ის პრეზიდენტი, შემდეგი ადმინისტრაციისთვის ხელისუფლების შეუფერხებელი გადაცემა მოხდება.

„დარწმუნებული ვარ, რომ ხელისუფლების გადაცემა მოხდება და ვინც არ უნდა იყოს პრეზიდენტი, 20 იანვრისთვის ყველა საშუალება იქნება ხელმისაწვდომი იმისთვის, რომ ამერიკელების უსაფრთხოება სათანადოდ იყოს დაცული,“- განაცხადა პომპეომ Fox News -თან ინტერვიუში.

კითხვაზე, ტრამპის უარი არჩევნების შედეგების აღიარებაზე აბრკოლებს თუ არა სახელმწიფო დეპარტამენტის ძალისხმევას, სტიმული მისცეს თავისუფალი და სამართლიანი არჩევნების ჩატარებას სხვა ქვეყნებში, პოპმეომ უპასუხა, „დეპარტამენტი ზრუნავს იმისთვის, მთელს მსოფლიოში თავისუფალი, სამართლიანი და უსაფრთხო არჩევნები ჩატარდეს.“