თბილისის საქალაქო სასამართლოში, რუსთაველის გამზირზე, პარლამენტის წინ საპროტესტო აქციაზე დაკავებული 2 პირის ნოდარ რუხაძისა და გიორგი მჟავანაძის პროცესი გრძელდება.
„სირცხვილიას“ წევრის სოფიო კუჭავას თქმით, მას მოსამართლემ სასამართლო სხდომის დარბაზი დაატოვებინა.
"სასამართლო პროცესი უკვე იმ ეტაპზეა გადასული, როდესაც დასკვნით სიტყვას ამბობენ. ბრალმდებელმა თავის სიტყვაში თქვა, რომ ნოდარ რუხაძე დამნაშავეა, რადგან ახლაც მოიტანა გარეთ შეშა და შესაძლოა, შემოაგდოსო. ვთქვი, რომ ეს ტყუილი იყო და მოსამართლემ დარბაზიდან გამომაგდო. მას შემდეგ მომდევენ და მეუბნებიან, პირადობა მოგვეციო. იციან, ვინც ვარ და თუ ჯარიმის დაწერა უნდათ, დამიწერონ", - განაცხადა სოფიო კუჭავამ.
სასამართლოს ეზოში ამ დრომდე იმყოფებიან მოძრაობა "სირცხვილიას" აქტივისტები, რომლებიც სასამართლოს გადაწყვეტილებას ელოდებიან.
ცნობისთვის, პარლამენტთან 4 პირი ადმინისტრაციულ სამართალდარღვევათა კოდექსის 166-ე და 173-ე მუხლების საფუძველზე დააკავეს, რაც პოლიციისადმი დაუმორჩილებლობასა და წვრილმან ხულიგნობას გულისხმობს.