ირანში გამდიდრებული ურანის რაოდენობა 2015 წელს გაფორმებული საერთაშორისო ხელშეკრულებით დაშვებულ რაოდენობაზე 12-ჯერ მეტია, - BBC-ის ინფორმაციით, ამის შესახებ ატომური ენერგიის საერთაშორისო სააგენტოში აცხადებენ.
ორგანიზაციის ინფორმაციით, ირანის გამდიდრებულმა ურანის მარაგმა თითქმის 2 443 კგ-ს მიაღწია.
ამასთან, ატომური ენერგიის საერთაშორისო სააგენტოს ინფორმაციით, ირანი აგრძელებს ურანის გამდიდრებას 4.5%–მდე, რაც ასევე არღვევს 2015 წლის საერთაშორისო ხელშეკრულებას, რომლის თანახმადაც, ურანის გამდიდრების ზედა ზღვარი 3.67%-ია.
BBC-ი წერს, რომ შარშან ირანმა 2015 წლის ბირთვული შეთანხმების ფარგლებში აღებული ვალდებულებების წინააღმდეგ წასვლა განზრახ და საჯაროდ დაიწყო. გამოცემის განმარტებით, ამ ნაბიჯით ირანი ცდილობს, აშშ-ის პრეზიდენტის, დონალდ ტრამპის მიერ შეთანხმების ცალმხრივად დატოვებისა და ირანის წინააღმდეგ სანქციების დაწესების გამო სამაგიერო გადაუხადოს. ცნობისათვის, აშშ-სა და ირანის გარდა 2015 წლის შეთანხმებას ხელი ჩინეთმა, საფრანგეთმა, გერმანიამ, რუსეთმა და დიდმა ბრიტანეთმაც მოაწერეს.