აშშ-ში, გასული დღის განმავლობაში კორონავირუსის 142 279 ახალი შემთხვევა გამოვლინდა, რაც რეკორდულად მაღალი დღიური მაჩვენებელია პანდემიის დაწყების დროიდან, - ამის შესახებ ინფორმაციას Reuters-ი ავრცელებს.

სააგენტოს ცნობით, აღნიშნულ პერიოდში 64 939 პაციენტის ჰოსპიტალიზაცია გახდა საჭირო, რაც ასევე უპრეცედენტოდ მაღალი დღიური რაოდენობაა. ამასთან, ვირუსს ქვეყანაში კიდევ 1 464 ადამიანის სიცოცხლე ემსხვერპლა. აღსანიშნავია, რომ მერვე დღეა აშშ-ში კოვიდ 19-ით ინფიცირების ახალი შემთხვევები 100 000-ს აჭარბებს.

როგორც კოვიდიფიცირებულების, ასევე ვირუსით დაღუპულთა რაოდენობით ქვეყანა პირველ ადგილზეა მსოფლიოში. აშშ-ში პანდემიის დაწყების დროიდან კორონავირუსის 10.7 მილიონი შემთხვევაა გამოვლენილი, დაღუპულთა რაოდენობა კი 247 000-ს აჭარბებს.