ხელისუფლებამ უკან დახევა დაიწყო - თუ აქამდე ამბობდნენ, რომ ყველაფერი დამთავრდა, დაგიჭერთ, ციხეში ჩაგსვამთ, პარტიას გავაუქმებთ, რამდენიმე დღის შემდეგ “ქართულ ოცნებაში“ გაკეთდა განცხადება, რომ დიალოგს წინ არაფერი უდგას, - ამის შესახებ “ერთიანი ნაციონალური მოძრაობის“ წევრმა რომან გოცირიძემ “პალიტრანიუსის“ გადაცემა “დღის ნიუსრუმში“ ისაუბრა.
გოცირიძის აზრით, ხელისუფლების წარმომადგენლების ოპოზიციასთან დიალოგზე წამოსვლა იმას ნიშნავს, რომ განხილული იქნება ყველა ის მოთხოვნა და პრეტენზია, რაც ოპოზიციურ პარტიებს ერთსულოვნად გააჩნია.
მისივე თქმით, “ქართული ოცნება“ კომფორტულ ვითარებაში არ არის, რადგან ზეწოლა ხდება როგორც შიგნიდან, ასევე გარედან. ამ კონტექსტში გოცირიძემ ხაზგასმით აღნიშნა, რომ არცერთი საკითხი, რაზეც “ქართული ოცნების“ ხელისუფლებას უკან დახევა და დათმობაზე წასვლა მოუწია, საშინაო და საგარეო ზეწოლის გარეშე არ გადაწყვეტილა.
გოცირიძის განცხადებით, საერთაშორისო პარტნიორებისთვის ანგარიშის არგაწევა ხელისუფლების კოლაფსს ნიშნავს.
“რომ არა საერთაშორისო პარტნიორების ზეწოლა, გიგი უგულავა და ირაკლი ოქრუაშვილი შეიძლება დღესაც ციხეში ყოფილიყვნენ, დღეს არჩევნები შეიძლება იმ წესით ჩატარებულიყო, რა წესითაც უნდოდათ ჩაეტარებინათ. პროპორციულთან მიახლოებულ საარჩევნო სისტემაზე გადასვლა ხელისუფლების იძულებითი ნაბიჯი იყო, როცა ზეწოლას ვერ გაუძლო. ზუსტად ეს მოდელია ახლაც. მათ იციან, რომ საერთაშორისო პარტნიორებთან საუბარი ძალიან სერიოზულ საერთაშორისო ზეწოლას ნიშნავს. რატომ დათანხმდნენ? აბა, რა არის ჩვენი ბიუჯეტი?! გამოაკელით ის 5-მილიარდი, რომელიც ბიუჯეტშია ჩადებული. იქნება კატასტროფა - ლარი საერთოდ არ იარსებებს და ბიუჯეტიდან პენსიებსაც ვერ დაარიგებენ. საერთაშორისო პარტნიორები ქვეყნის მხარდაჭერას ნიშნავს - მათ შორის ფინანსურ მხარდაჭერასაც“, - განაცხადა რომან გოცირიძემ.