“ევროპული საქართველოს“ ერთ-ერთი ლიდერის გიგა ბოკერიას ინფორმაციით, ოპოზიციურ პარტიებს შორის გამართულ შეხვედრაზე საქართველოში მაიკ პომპეოს ჩამოსვლასთან დაკავშირებული აქციის დეტალები შეთანხმდა.

“როდესაც ჩვენი მთავარი სტრატეგიული პარტნიორის, აშშ-ს სახელმწიფო მდივანი ჩამოდის, უნდა იყოს აქცია - ჯერ ერთი, ამ კარგი ამბის აღსანიშნავად. ის, რომ საქართველო მთავარი პარტნიორების ყურადღების ქვეშ უნდა იყოს, ამ თვალსაზრისით სახელმწიფო მდივნის ვიზიტი ძალიან კარგი ამბავია. მეორე მხრივ, ყველა ამგვარი მოვლენა კარგი შესაძლებლობაა, მათ შორის საერთაშორისო მედიას დღევანდელი სახიფათო ვითარება ვაჩვენოთ, რომელიც ივანიშვილის რეჟიმმა შექმნა“, - განუცხადა ჟურნალისტებს გიგა ბოკერიამ.

ცნობისთვის, 18 ნოემბერს ოპოზიცია აშშ-ის სახელმწიფო მდივნის მაიკ პომპეოს ვიზიტის პარალელურად მდუმარე აქციას გამართავს.

მაიკ პომპეოს ვიზიტი საქართველოში 17-18 ნოემბერს არის დაგეგმილი.