აშშ-ში კორონავირუსით ინფიცირებულთა რაოდენობამ 11 მილიონს გადააჭარბა, - ამის შესახებ ინფორმაციას Reuters-ი ავრცელებს.
გამოცემის ცნობით, აშშ-ში პანდემიის გავრცელების ტემპი დაჩქარდა. კერძოდ, ინფიცირებულების რაოდენობა 10-დან 11 მილიონამდე 8 დღეში გაიზარდა, შემთხვევების 9-დან 10 მილიონამდე გაზრდას 10 დღე დასჭირდა, 8 მილიონიდან 9 მილიონამდე კი ინფიცირებულების რიცხვმა 16 დღეში მიაღწია.
აღსანიშნავია, რომ ბოლო კვირის განმავლობაში აშშ-ში ყოველდღიურად, საშუალოდ, დაინფიცირების 144 000-ზე მეტი შემთხვევა ფიქსირდებოდა, დაღუპულთა რაოდენობა კი ყოველდღიურად 1 120-ით იზრდებოდა.
Reuters-ი წერს, რომ მსოფლიოში გამოვლენილი კოვიდინფიცირების 54 მილიონზე მეტი შემთხვევიდან დაახლოებით 20% აშშ-ზე მოდის, ქვეყანაში ვირუსის დაღუპულთა რაოდენობა კი მსოფლიოში დაფიქსირებული ფატალური შემთხვევების დაახლოებით 19%-ია.