მიუხედავად დევიაციებისა - მარცხნივ, მარჯვნივ, ხომალდი მიდის და ამ ხომალდის ყველა წევრს გაცნობიერებული აქვს ერთი რამ, ჩვენ ამ შემთხვევაში, გაერთიანებული ვართ თავისუფალი და სამართლიანი არჩევნების მოთხოვნით, - ამის შესახებ "ევროპული საქართველოს" ერთ-ერთმა ლიდერმა გიგი უგულავამ ჟურნალისტებს განუცხადა, რითაც უპასუხა დასმულ შეკითხვას აქციაზე ბანერის დემონასტრირებაზე წარწერით "მიშა ჩამოდი".
გიგი უგულავას განმარტებით, სამართლიანი და თავისუფალი არჩევნების არის ის ფუნდამენტი, რომელშიც აბსოლუტურად ყველა პარტია მონაწილეობს.
"ამასთან დაკავშირებით კოლეგებთანაც ვიმუშავეთ და ყოველთვის ვმუშაობთ. მიუხედავად იმისა, რომ არის მწვავე საკითხები, რომელშიც განსხვავებებია, ეს საკითხები გვერდზე უნდა გადაიდოს. სამართლიანია, თუ უსამართლო, ამ შემთხვევაში, ამაზე არ ვდაობთ, იმიტომ, რომ მთავარი არის ერთობის შენარჩუნება. ერთობის შენარჩუნება შესაძლებელია ძირითად საკითხზე- არჩევნების სამართლიან და თავისუფალ გარემოში ჩატარება. ეს გვაერთიანებს, ამიტომ რაც არ უნდა გადავიხაროთ მარჯვნივ, მარცხნივ, ყველას აქვს უფლება მოითხოვოს ეს, ის, მაგრამ ოპოზიციის ამ ერთობის ოფიციალური ხაზი შედგება შემდეგისგან - ვითხოვთ თავისუფალ, სამართლიან არჩევნებს", - განაცხადა გიგი უგულავამ.