ტრანსადრიატიკული მილსადენი, რომელიც აზერბაიჯანის გაზის ევროკავშირის ქვეყნებში ტრანსპორტირებისთვის აშენდა, კომერციულ ექსპლუატაციაშია შესული. ამის შესახებ ინფორმაცია პროექტის ოფიციალურ ვებგვერდზეა განთავსებული.

გაზის სატრანსპორტო სისტემა, რომლის სიგრძეა 878 კილომეტრი, კვეთს საბერძნეთს, ალბანეთს, ადრიატიკის ზღვას და იტალიას.

მისი მეშვეობით მოხდება გაზის ტრანსპორტირება კასპიის ზღვაში არსებული საბადო „შაჰდენიზი 2“-დან.

ტრანსადრიატიკული მილსადენი TAP - არის სამხრეთი გაზის დერეფნის ევროპული მონაკვეთი, რომლის მეშვეობითაც, ყოველწლიურად ევროპის რამდენიმე ბაზარზე აზერბაიჯანიდან 10 მილიარდი კუბური მეტრი ბუნებრივი აირის ტრანსპორტირება მოხდება. გაზსადენის გამტარიანობის შესაძლებლობა წელიწადში 20 მილიარდი კუბური მეტრი გაზია.

მილსადენი TAP უერთდება ტრანსანატოლიურ გაზსადენს - TANAP-ს თურქეთ-საბერძნეთის საზღვარზე, კვეთს საბერძნეთს, ალბანეთს და ადრიატიკის ზღვას, შემდეგ კი გადის სამხრეთ იტალიის სანაპიროზე.

პროექტის ღირებულებამ 40 მილიარდი აშშ დოლარი შეადგინა.