„ლელო საქართველოსთვის“ ოფისში ოპოზიციის წარმომადგენლების შეხვედრა მიმდინარეობს.

როგორც „ლელოს“ ერთ-ერთმა წევრმა, საბა ბუაძემ განაცხადა, დღევანდელ შეხვედრაზე 21 ნოემბერს დაანონსებული აქციის ფორმაზე იმსჯელებენ.

მისივე თქმით, საარჩევნო უბნებზე “სირცხვილის დერეფნები” არ იქნება.

„დღეს გვაქვს მორიგი შეხვედრა, სადაც ჩვენი საპროტესტო ღონისძიებების დაგეგმვას შევეცდებით. მოგეხსენებათ, 21-ში არის მეორე ტური და ჩვენ გვინდა ერთიანი საზოგადოებრივი პროტესტი მეორე ტურის პარალელურადაც მოვახერხოთ და დავაორგანიზოთ. ეს პროტესტი მოიცავს ყველა შესაძლო ფორმას, რომელიც არის კანონის ფარგლებში. ოპოზიცია ჯერ არ შეთანხმებულა იმ ფორმაზე, რა ფორმითაც ჩავატარებთ აქციას, თუმცა რაც ვიცი, შემიძლია დანამდვილებით გითხრათ, რომ “სირცხვილის დერეფნები” საარჩევნო უბნებზე “ლელოს” და “ერთიანი ოპოზიციის ფორმატში არ მოეწყობა. თუ ვინმე ამას ინდივიდუალურად გააკეთებს, ეს მათი გადაწყვეტილებაა. ჩვენ ვეწინააღმდეგებით პროტესტის ასეთ ფორმას და მიგვაჩნია არაპროდუქტიულად და არაკონსტრუქციულად“, - განაცხადა ბუაძემ.

მისივე თქმით, არჩევნების მეორე ტურში უბნებზე “ლელოს” წარმომადგენლები არ იქნებიან.

“ვინაიდან მეორე ტურში არ ვმონაწილეობთ, ცხადია “ლელოს” წარმომადგენლები საარჩევნო უბნებზე არ იქნებიან. ამ ტყუილში მონაწილეობას არ ვაპირებთ არცერთი ფორმით, მათ შორის, არც დამკვირვებლების გაგზავნით”,- განაცხადა ბუაძემ.