ზაალ უდუმაშვილი - თუ აწყობთ, სიაში დამატებით ჰყავდეთ დეპუტატები, რომლებიც აცხადებენ, არ ვართ ბატონო ამ პარლამენტის წევრებიო და ესენი გვეჭიდავებიან, გინდა თუ არა ხართო, მაშინ კი ბატონო, იყოს ასე
„ნაციონალური მოძრაობის” წევრის, ზაალ უდუმაშვილის განცხადებით, არანაირი მნიშვნელობა არ აქვს, მე-10 მოწვევის პარლამენტი ოპოზიციონერი დეპუტატების სადეპუტატო უფლებამოსილების შეწყვეტის საკითხს ფორმალურად კენჭს უყრის თუ არა.
მისი თქმით, ოპოზიცია პარლამენტში შესვლას არ აპირებს.
„ფორმალურად ამას როგორ გააფორმებენ, საერთოდ არანაირი მნიშვნელობა არ აქვს. ჩვენ ვაცხადებთ, რომ არ ვაპირებთ პარლამენტში შესვლას. ისინი ჩვენს განცხადებებს კენჭს უყრიან, დაეთანხმებიან თუ არ დაეთანხმებიან, ეს მათი გადასაწყვეტია. ფორმალურად რა აზრი აქვს იმ პარლამენტში ყოფნას, რომელსაც არ ცნობ და მის მუშაობაშიც არ იღებ მონაწილეობას? თუ აწყობთ, რომ დამატებით ჰყავდეთ სიაში დეპუტატები, რომლებიც აცხადებენ, რომ არ ვართ ბატონო ამ პარლამენტის წევრებიო და ესენი გვეჭიდავებიან, რომ გინდა თუ არა ხართო, მაშინ კი ბატონო, იყოს ასე”,- განაცხადა უდუმაშვილმა.
ცნობისთვის, „ქართული ოცნების“ აღმასრულებელი მდივანი ირაკლი კობახიძე არ გამორიცხავს, რომ მმართველმა გუნდმა სადეპუტატო უფლებამოსილების შეწყვეტის თაობაზე მე-10 მოწვევის პარლამენტში არჩეული ოპოზიციონერი დეპუტატებისთვის სადეპუტატო უფლებამოსილების შეწყვეტის საკითხს კენჭი არ უყაროს. როგორც კობახიძე აცხადებს, „პარლამენტის გადასაწყვეტია, დაატოვებინებს თუ არა პარლამენტის წევრს პარლამენტს“.
