ჯო ბაიდენი თავისი კაბინეტის შემადგენლობის ნაწილს სამშაბათს დაასახელებს, - ამის შესახებ ინფორმაციას Reuters-ი ჯო ბაიდენის თანაშემწეებზე დაყრდნობით ავრცელებს.

ჯო ბაიდენის შტაბის წევრი რონ კლეინი, რომელიც ბაიდენმა მომავალი ადმინისტრაციის აპარატის უფროსად დაასახელა, პრეზიდენტ დონალდ ტრამპის ადმინისტრაციას, კერძოდ, გენერალური მომსახურების ადმინისტრაციას, რომელიც გარდამავალ პერიოდში საპრეზიდენტო ძალაუფლების გადაბარებას უზრუნველყოფს, მოუწოდებს, ბაიდენის არჩევნებში გამარჯვება ოფიციალურად აღიაროს.

„ვიმედოვნებ, გენერალური მომსახურების ადმინისტრაციის ხელმძღვანელობა თავის სამუშაოს შეასრულებს“, – განაცხადა რონ კლეინმა.

ამასთან, მისი თქმით, ჯო ბაიდენი კოვიდ-19-ის პანდემიის გამო შეზღუდული მასშტაბის ინაუგურაციის ჩატარებას გეგმავს.

ცნობისათვის, აშშ-ის მომავალი პრეზიდენტის ინაუგურაცია 20 იანვარს გაიმართება.

იხილეთ ვიდეო: ესპანეთში კორონავირუსის საწინააღმდეგო ვაქცინაცია იანვარში დაიწყება და უფასო იქნება