„ჯოკერი“ ყველას გვითამაშია - „წაგლეჯვაში“ „შეიტენა“ ბიძინა ივანიშვილმა. ის „პრემიაზე“ ვეღარ გავა, - ამის შესახებ „გაერთიანებული ოპოზიციის“ ერთ-ერთმა ლიდერმა გუბაზ სანიკიძემ ტელეკომპანია „პალიტრანიუსის“ გადაცემა „ნიუსრუმში“ განაცხადა.
როგორც ის აცხადებს, ხელისუფლებას „ოპოზიციის ჭკუაზე წასვლა მოუწევს“.
„ქართულ ოცნებას“ იგივე ელოდება, რაც ექიმებთან დაკავშირებით დაემართა. გუშინ ყურებდაცქვეტილები რომ უსმენდნენ უცხოეთში მოღვაწე ქართველ ექიმებს, იგივე ელოდებათ ორ თვეში პოლიტიკაში, მოუწევთ ოპოზიციის ჭკუაზე წასვლა. მთავარი ამოცანაა ოპოზიცია არ გაიბზაროს და პრინციპული პოზიცია შეინარჩუნოს“,- განაცხადა სანიკიძემ.
ამასთან, როგორც გუბაზ სანიკიძე აღნიშნავს, ისე არ მოხდება, რომ ოპოზიცია ბიძინა ივანიშვილისთვის ლეღვის ფოთოლი აღმოჩნდეს.
„ხელისუფლების გადასაწყვეტია, საქართველო თურქმენეთი გახდება, თუ ცოტა სულს მოითქვამს. ის, რომ ოპოზიცია ბიძინა ივანიშვილისთვის ლეღვის ფოთოლი აღმოჩნდეს, ასე არ იქნება. ამ სურვილს ოპოზიცია ბიძინა ივანიშვილს არ შეუსრულებს, გამორიცხულია. საკმაოდ გამოცდილი და საკმაოდ „გაეშმაკებულია“ ოპოზიცია“,- განაცხადა სანიკიძემ.
გარდა ამისა, სანიკიძე ფიქრობს, რომ მმართველ გუნდს დათმობებზე წასვლა მოუწევს და აცხადებს, რომ „ხელისუფლების საქმე ცუდადაა“.
„ხელახალ არჩევნებში ის მოხდება, რაც ახლა მოხდა და არ გაფორმდა. 2:1 მოიგებს ოპოზიცია. ხელისუფლებას არაფრის დათმობა რომ არ უნდა, ძნელი გამოსაცნობი არ არის, მაგრამ მოუწევს. ჩემი ანგარიშით, დაახლოებით ახალი წლების შემდეგ, როდესაც პოლიტიკური სეზონი დაიწყება, განსაკუთრებით ვაშინგტონში, როდესაც ახალი ადმინისტრაცია მოვა, ხელისუფლებას მოუწევს რაღაცების დათმობა იმიტომ, რომ რამდენადაც ინფორმაცია მაქვს, ბიძინა ივანიშვილს „დემოკრატიულ პარტიასთან“ მაინცდამაინც სერიოზული კავშირები არ უნდა ჰქონდეს. ბაიდენის გაპრეზიდენტება ნიშნავს, რომ აღმოსავლეთ ევროპაში ამერიკის შეერთებული შტატები ძალიან გააქტიურდება. ასე რომ, იცინის ის, ვინც ბოლოს იცინის. რაც არ უნდა ხელისუფლებას თავი ეჭიროს, მათი საქმე ძალიან ცუდად აქვს“,- განაცხადა სანიკიძემ.