პროკურორ მიხეილ სადრაძის განცხადებით, საგარეო საქმეთა მინისტრის ყოფილი მოადგილე ნინო კალანდაძე დავით გარეჯის თემაზე მის მიერ გაკეთებულ საჯარო განცხადებებთან დაკავშირებით საგამოძიებო ორგანოს კითხვებს გასცემს პასუხს.

როგორც სადრაძე განმარტავს, ნინო კალანდაძეს ყველა იმ კითხვას დაუსვამენ, რომელიც საქმესთან შემხებლობაშია და რელევანტურია.

„მოსამართლის წინაშე დაიკითხება ნინო კალანდაძე, მან უარი განაცხადა ნებაყოფლობით საგამოძიებო ორგანოში გამოცხადებაზე, ამიტომ დაიკითხება სასამართლოს წინაშე. დაკითხვის საფუძველს რაც შეეხება, ის მოწმეთა გამოკითხვის ოქმებშიც ფიგურირებს, მაგრამ ერთ-ერთი მნიშვნელოვანი გახლავთ ის, რომ საგარეო საქმეთა მინისტრის მოადგილის პოსტზე ყოფნისას საჯარო განცხადება გააკეთა პრესკონფერენციაზე, სადაც მიუთითა, რომ დავით გარეჯი საქართველოს ტერიტორიებში არ იყო, ასევე გაკეთებული აქვს სხვადასხვა სატელევიზიო განცხადებები“, - განაცხადა სადრაძემ.