საქართველოს ატლანტიკური საბჭოს ვიცე-პრეზიდენტის ბათუ ქუთელიას შეფასებით, ხელისუფლება საკუთარი გადაწყვეტილებებით ძალაუფლების შენარჩუნებას ცდილობდა. მან დღეს არსებული ეპიდვითარების ფონზე დაწესებული შეზღუდვები შეაფასა და აღნიშნა, რომ დღეს საქართველოს მოსახლეობას სასიცოცხლო მნიშვნელობის პრობლემები აქვს.

„ქართული ოცნების“ ხელისუფლების ყველა გადაწყვეტილება ბოლო ერთი წლის განმავლობაში მორგებული იყო იმაზე, როგორ შეენარჩუნებინათ ძალაუფლება მას შემდეგ, რაც კონსტიტუცია ცალმხრივად გადაწერეს. აქედან დაწყებული ისინი ნაბიჯ-ნაბიჯ მიდიოდნენ ქვეყანაში ძალაუფლების უზურპაციისკენ. ამიტომაც ყველა გადაწყვეტილების არაგაცხადებული მთავარი რაციონალი იყო ძალაუფლების შენარჩუნება. დღეს ჩვენი ქვეყნის მოსახლეობას აქვს სასიცოცხლო მნიშვნელობის პრობლემები, თვითგადარჩენის პრობლემა იმ ეკონომიკური კატასტროფიდან, სადაც უკვე შევედით. აქედან გამომდინარე, შეიძლება მათ ყოველდღიურ საქმიანობაში არ შედიოდეს ძალაუფლების მიტაცებაზე ან ხელისუფლებაზე ფიქრი, მაგრამ ჩვენი ამოცანა სწორედ ისაა, ავუხსნათ მოქალაქეებს, რომ ის პრობლემები, რაც დღეს აქვთ და რაც ხვალაც დაემუქრებათ, რეალურად გამომდინარეობს იქედან, რომ ქვეყანას არალეგიტიმური მმართველი ჰყავს“,-განაცხადა ქუთელიამ.