ირანის ხელისუფლება აცხადებს, რომ ირანელი მეცნიერის, მოსენ ფახრიზადეს, მკვლელობის ფაქტში „ისრაელის პასუხისმგებლობის სერიოზული ნიშნები“ ჩანს და რომ ქვეყანა იტოვებს უფლებას, საკუთარი თავი დაიცვას,- Reuters-ის ინფორმაციით, ამის შესახებ საუბარია წერილში, რომელიც ირანის ელჩმა გაეროში მაჯიდ თახთ რავანჩიმ გაეროს უშიშროების საბჭოსა და გაეროს გენერალურ მდივან ანტონიო გუტერეშს მისწერა.
„შეერთებული შტატებისა და ისრაელის მხრიდან ჩემი ქვეყნის მიმართ ნებისმიერი ავანტიურისტული ზომების შემთხვევაში, განსაკუთრებით შეერთებული შტატების ამჟამინდელი ადმინისტრაციის დარჩენილი პერიოდის განმავლობაში, ირანის ისლამური რესპუბლიკა იტოვებს უფლებას, მიიღოს ყველა საჭირო ზომა საკუთარი ხალხისა და ინტერესების დასაცავად,“- აღნიშნულია წერილში.
ბირთვული სფეროს ერთ-ერთი მთავარი ირანელი მეცნიერი მოსენ ფახრიზადე გუშინ თეირანთან ახლოს მოკლეს. ირანის საგარეო საქმეთა მინისტრმა მუჰამედ ჯავად ზარიფმა მომხდარს „სახელმწიფო ტერორის აქტი“ უწოდა და ისრაელზე მიანიშნა.