23 წლის თამარ ბაჩალიაშვილის ოჯახის ადვოკატი მიხეილ რამიშვილი თბილისის პროკურატურაში საქმის მასალებს გაეცნობა. როგორც რამიშვილმა „ინტერპრესნიუსს“ განუცხადა, საგამოძიებო უწყებაში იმ მასალებს გაეცნობა, რომელსაც „გრიფით საიდუმლო“ მოეხსნა. რაც შეეხება გამოძიების პროცესს, როგორც რამიშვილი ამბობს, აქვს ინფორმაცია, რომ თამარ ბაჩალიაშვილი ნამდვილად მოკლეს და იმოქმედებს იმ პირების დასადგენად, ვინც ეს ჩაიდინა.
„იმაზე მეტი რა უნდა იყოს, რომ გავარკვიეთ ჩვენ თვითონ, რომ ის აბები, რომელიც ვითომ შეიძინა თამარმა, თამარის მიერ არ არის შეძენილი. გარკვეული ინფორმაციაც მაქვს, რომ შეიძლება ვივარაუდოთ, რომ ის ნამდვილად მოკლულია და შეიძლება რამდენიმე ხნის შემდეგ გარკვეული ინფორმაციაც მოვიპოვო, როგორ და რანაირად მოხდა ეს ყველაფერი, თუ გამოძიება ამას გამოიძიებს. შემიძლია გითხრათ, რომ ინტერესიც კი იყო გარკვეული პირების. ვიმოქმედებ ისე, რომ დავადგინო ის პირები, ორი იქნება თუ სამი, ის მამაკაცები, ვინც მკვლელობა ჩაიდინა“,- განაცხადა რამიშვილმა.
ცნობისთვის, თამარ ბაჩალიაშვილი 18 ივლისს გაუჩინარდა. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს.