„ევროპული საქართველოს“ ერთ-ერთი ლიდერის, დავით ბაქრაძის განცხადებით, ოპოზიციასა და ხელისუფლებას შორის მიმდინარე ბოლო შეხვედრაზე ოპოზიციამ წარადგინა წინადადება ვადამდელი არჩევნების დანიშვნასთან დაკავშირებით, რაზეც ხელისუფლების მხრიდან ოფიციალური პასუხი არ მიუღიათ.

როგორც დავით ბაქრაძემ ჟურნალისტებთან საუბრისას განაცხადა, ოპოზიციასა და ხელისუფლებას შორის მოლაპარაკების მესამე რაუნდი მაშინ შედგება, როდესაც მმართველი გუნდი ოპოზიციას „შინაარსობრივ და აზრიან“ წინადადებას წარუდგენს.

„მეორე რაუნდი დასრულდა ოპოზიციის შეთავაზებით, რომ პოლიტიკური კრიზისიდან გამოსავალი და განმუხტვა არის გაზაფხულზე რიგგარეშე არჩევნების, ვადამდელი არჩევნების ჩატარება. მიუხედავად იმისა, რომ სატელევიზიო პასუხი მოვისმინეთ, ოფიციალურად მოლაპარაკების მაგიდასთან ამაზე უარი ხელისუფლებისგან არ მიგვიღია, არ მიგვიღია მათი მხრიდან შემხვედრი წინადადება, რას გვთავაზობს ხელისუფლება კრიზისიდან გამოსასვლელად, ხელისუფლება როცა მზად იქნება, ექნებათ რაიმე ტიპის წინადადება, რომელსაც ჩვენი შუამავლები, ელჩები ჩათვლიან, რომ საკმარისი საფუძველია, რომ მესამე რაუნდი შედგეს და ვიმსჯელოთ, მაშინ შედგება. შეკრებას, შეკრების გულისთვის არავინ აპირებს. ბოლო რაუნდი დასრულდა ოპოზიციის წინადადებით, დღეს მაგიდაზე დევს ოპოზიციის წინადადება ვადამდელი არჩევნების შესახებ, არაფერი არ დევს მაგიდაზე „ქართული ოცნებისგან“ ამიტომ ბურთი „ქართული ოცნების“ მხარეს არის, ველოდებით ჩვენ და ელჩები რას შემოგვთავაზებს „ქართული ოცნება“, - განაცხადა ბაქრაძემ.