„ქართული ოცნების“ რეპრესიული მანქანა კვლავინდებურად აგრძელებს მშვიდობიანი მოქალაქეების დევნას და დაპატიმრებას“,-ამის შესახებ პარტია „ლელო საქართველოსთვის" განცხადებაშია აღნიშნული.
როგორც პარტიაში აღნიშნავენ, „ლელო საქართველოსთვის" ქალთა საბჭო სრულ სოლიდარობას უცხადებს სამოქალაქო აქტივისტებს ნათია ლეთოდიანს და შუშანა მაცაბერიძეს, რომლებიც დღეს, 28 ნოემბერს პარლამენტის წინ საპროტესტო აქციის მსვლელობისას დააკავეს, სადაც აქციის მონაწილეები, დროებით აღმართულ კონსტრუქციაზე, საპროტესტო წარწერების გაკეთებას გეგმავდნენ.
„ლელო საქართველოსთვის“ მოუწოდებს სამართალდამცავ ორგანოებს, დროულად გაათავისუფლონ დაკავებული აქტივისტები, პატივი სცენ მოქალაქეების სიტყვის და გამოხატვის თავისუფლებას, როგორც „უზენაესი ადამიანური ფასეულობას". შესაბამისად, უარი თქვან საკუთარი თანამოქალაქეების წინააღმდეგ უკანონო დავალებების აღსრულებაზე. პარტიაში აღნიშნავენ, რომ საქართველოს მოქალაქეების კონსტიტუციური უფლებაა სხვადასხვა ფორმით გამოხატონ მშვიდობიანი პროტესტი ქვეყანაში მიმდინარე მოვლენებთან დაკავშირებით.