პარლამენტის შენობასთან სამოქალაქო აქტივისტების ნაწილი ღამის კარავში გატარებას აპირებს.
როგორც ჟურნალისტებს „მოძრაობა საქართველოსთვის“ წარმომადგენელმა კახა კვეკვესკირმა განუცხადა, კარავში 20-მდე ადამიანი დარჩება, რომელთაც საშვები არ აქვთ.
„აქციის მონაწილეების მოთხოვნაა ვადამდელი არჩევნები, „კომენდანტის საათის“ გაუქმება და პოლიტპატიმრების გათავისუფლება. ეს აქცია არის უწყვეტი, ვრჩებით ადგილზე და 20-მდე ადამიანი ღამე ვაპირებთ კარავში ვიყოთ. საშვები არ გვაქვს, მაგრამ დილიდანვე ვცდილობდით პოლიციასთან გვეთანამშრომლა წესრიგის დაცვის კუთხით და ამ სუბორდინაციას ერთმანეთში ვიცავთ“, - განაცხადა კვეკვესკირმა.
თავის მხრივ, მოძრაობის ერთ-ერთმა აქტივისტმა ნიკა ნარსიამ სამოქალაქო სექტორს მოუწოდა პარლამენტის შენობასთან მივიდნენ.
„მოგიწოდებთ, გამოიღვიძოთ და მოხვიდეთ აქ, ერთად შევქმნათ გამარჯვება! ჩვენი მოთხოვნებია „ლოქდაუნში“ გამოკეტილი ადამიანების სოციალური დახმარება, პირველადი მედიკამენტების მიწოდება სოციალურად დაუცველებისთვის, რომლებიც შიმშილისგან იღუპებიან და ორი თვე ვერაფრით გაძლებენ“, - განაცხადა ნარსიამ.