რუსეთი კორონავირუსის საწინააღმდეგო ვაქცინას „სპუტნიკ V“ გაერო-ში წარადგენს
რუსეთის ჯანდაცვის მინისტრი მიხეილ მურაშკო კორონავირუსის საწინააღმდეგო რუსული პოტენციური ვაქცინის, „სპუტნიკ V“-ის გაერო-ს შტაბბინაში წარდგენას გეგმავს, - ამის შესახებ ინფორმაციას რუსული მედია ავრცელებს.
მათივე ინფორმაციით, ვაქცინის პრეზენტაცია დღეს, ონლაინ ფორმატში გაიმართება.
სექტემბერში რუსეთის პრეზიდენტმა ვლადიმერ პუტინმა გაერო-ს გენერალურ ასამბლეაზე სიტყვით გამოსვლისას განაცხადა, რომ რუსეთი მზად იყო გაერო-ს პერსონალისთვის ნებაყოფლობითი ვაქცინაციისთვის საჭირო რუსული ვაქცინის მიწოდება უზრუნველყო.
შეგახსენებთ, რუსეთში ამ დროისთვის კორონავირუსის საწინააღმდეგო ორი ვაქცინაა დარეგისტრირებული :“სპუტნიკ V" და „ეპივაკკორონა“.
