ბუტა რობაქიძის საქმეზე შინაგან საქმეთა ყოფილი მინისტრის, ბრალდებულ ირაკლი ოქრუაშვილის ადვოკატისთვის არჩევნებიდან მალევე სასამართლო პროცესების განახლება კითხვის ნიშნებს ბადებს.

როგორც ადვოკატი "ინტერპრესნიუსთან" საუბარში განმარტავს, აღნიშნულით სამართლებრივი ნორმა არ ირღვევა, თუმცა, კითხვები ჩნდება.

„სამართლებრივად სასაუბრო ცოტა არის, პოლიტიკური მიზანშეწონილობიდან და არსებული ვითარებიდან გამომდინარე უნდა შეფასდეს ეს საკითხი. არჩევნებამდე, თვეების განმავლობაში, არც ერთი პროცესი ჩანიშნული არ იყო და არჩევნების შემდეგ, ერთდროულად ყველა გახმაურებული საქმის პროცესის ჩანიშვნა ზოგადად, კითხვის ნიშნებს აჩენს. შეიძლება ამით კანონი და ნორმა არ ირღვევა, მაგრამ თვეების განმავლობაში არაფერი იყო და ახლა ერთდროულად ჩაინიშნა პროცესები. მათ შორის, ირაკლი ოქრუაშვილის საქმე უვადოდ გადაიდო და ახლა დაგვირეკეს, რომ 14 დეკემბერს შევიკრიბოთ, რომ სამუშაო გრაფიკი განვსაზღვროთო“, - აცხადებს ჭაბაშვილი.

ცნობისთვის, ირაკლი ოქრუაშვილსა და ზურაბ ადეიშვილს ბუტა რობაქიძის საქმეზე სამსახურებრივი უფლებამოსილების ბოროტად გამოყენებას ედავებიან. ირაკლი ოქრუაშვილსა და ზურაბ ადეიშვილს ბრალი საქართველოს სსკ-ის 332-ე მუხლის მესამე ნაწილის „გ“ ქვეპუნქტით (2006 წლის 31 მაისამდე მოქმედი რედაქცია) წარედგინათ, რაც სასჯელის სახედ თავისუფლების აღკვეთას სამიდან რვა წლამდე ვადით ითვალისწინებს.